രട്ടമലൈ ശ്രീനിവാസൻ - പറയർ മഹാജനസഭാ സ്ഥാപകൻ

ദിവാൻ ബഹദൂർ ആർ.ശ്രീനിവാസൻ (1860-1945) തമിഴ്നാട്ടുകാരൻ, ഇന്ത്യയിലെ ദളിത് സമരങ്ങളുടെ അമരക്കാരനും ഗാന്ധിജിയുടെ അടുത്ത അനുയായിയുമായിരുന്നു. മദിരാശിപട്ടണത്തിൽ പാവപ്പെട്ട കുടുംബത്തിൽ ജനിച്ച ഇദ്ദേഹം പറയരുടെ നേതാവായിരുന്ന അയോദ്ധീദാസിന്റെ മച്ചുണനുമായിരുന്നു. ദക്ഷിണാഫ്രിക്കയിൽ ഗാന്ധിജിയോടൊപ്പം വക്കീലായി പ്രവർത്തിച്ചിരുന്നു. 1891ൽ പറയർ മഹാജനസഭ എന്ന പ്രസ്ഥാനത്തിന് ഇദ്ദേഹം രൂപം കൊടുത്തു. പിൽക്കാലത്ത് ആദിദ്രാവിഡ മഹാജനസഭ എന്ന പേരിൽ ഇത് അറിയപ്പെട്ടു. 1893ൽ ‘പറയൻ’ എന്ന പേരിൽ തമിഴ് പത്രം ആരംഭിച്ചു.ആ കാലത്ത് പറയർക്ക് ധാരാളം അടിച്ചമർത്തലുകൾ അനുഭവിക്കേണ്ടി വന്നിരുന്നു.


സ്വാതന്ത്ര്യ സമര സേനാനിയായിരുന്ന അദ്ദേഹത്തിനെതിരെ നാടു വിട്ടു എന്ന പേരിൽ അറസ്റ്റ് വാറണ്ട് പുറപ്പെടുവിച്ചിരുന്നു. പത്രത്തിലെ എഴുത്തുകൾ കാരണം അദ്ദേഹത്തിന് പിഴയടയ്‌ക്കേണ്ടി വന്നു. 1930ലും 1931നും ലണ്ടനിൽ നടന്ന വട്ടമേശസമ്മേളനത്തിൽ അംബേദ്കർ, എം.സി.രാജ തുടങിയവരോടൊപ്പം പറയരുടെ നേതാവായി ഇദ്ദേഹവും പങ്കെടുത്തിരുന്നു. മഹാത്മാഗാന്ധി രൂപപ്പെടുത്തിയ ബോർഡ് ഓഫ് അൺടച്ചബിൾസ് സൊസൈറ്റിയിൽ അംഗത്വമുണ്ടായിരുന്ന ഇവർ പിന്നീട് ഇതിൽ നിന്നും പിന്മാറുകയും മദ്രാസ് പ്രൊവിൻസ് ഷെഡ്യൂൾഡ് കാസ്റ്റ് ഫെഡറേഷൻ എന്ന പേരിൽ പുതിയ സംഘടന ആരംഭിക്കുകയും ചെയ്തു.

Rettamalai Srinivasan memorial building, Gandhi Mandapam, Chennai

2011 ജൂലൈ 6 ന് അദ്ദേഹത്തിന്റെ ജന്മദിനം ആചരിക്കുവാനായി തമിഴ്നാട് മുഖ്യമന്ത്രി തിരു.ജയലളിത ഉത്തരവിടുകയും തുടർന്നുള്ള എല്ലാ വർഷവും ജൂലൈ 6 അദ്ദേഹത്തിന്റെ ജന്മദിനമായി സംസ്ഥാനത്ത് ആചരിക്കുവാനും തീരുമാനിക്കുകയും ചെയ്തു. അദ്ദേഹത്തിന്റെ പേരമകൻ ശ്രീ. ബി.പരമേശ്വരൻ തമിഴ്നാട് സർക്കാരിലെ മന്ത്രിയും പിന്നീട് എം.പി.ആയി തെരഞ്ഞെടുക്കപ്പെടുകയും ചെയ്തു